কাজিৰঙাত বঙহে খাইছে বঙহৰ মঙহঃ ১টা মৃত বাঘ উদ্ধাৰ

ডিজিটেল ডেস্ক, বিৰ্তক, ১৬ এপ্ৰিল, বোকাখাট :: কাজিৰঙা ৰাষ্ট্ৰীয় উদ্যানৰ কঁহৰা বনাঞ্চলৰ মিহিবিলৰ পাৰত আজি পুৱাৰ ভাগত বনকৰ্মীয়ে এটা ঢেকীয়াপতীয়া বাঘৰ মৃতদেহ উদ্ধাৰ কৰে। বিলখনৰ পাৰতে প্ৰায় তিনিদিনমান পূৰ্বে বাঘটোৰ মৃত্যু হোৱা বুলি জানিব পৰা গৈছে। মৃত বাঘটোৰ দেহৰ পিছ অংশ ইতিমধ্যেই অন্য বাঘে ভক্ষণ কৰা বুলি বন কৰ্মীয়ে জানিবলৈ দিছে। বুধবাৰে বিয়লি হাতী চৰাবলৈ অহা বনকৰ্মীয়ে বাঘটো প্ৰত্যক্ষ কৰাৰ পাছত নিশা অন্য বাঘে মৃত বাঘটো ভক্ষণ কৰিবলৈ অহা দেখা পায়।

ইফালে আজি পুৱা মিহিবিলৰ পাৰতেই কাজিৰঙাৰ পানবাৰীত থকা বন্যপ্ৰাণী পুনৰ সংস্থাপন আৰু সংৰক্ষণ কেন্দ্ৰৰ পশুচিকিৎসক  প্ৰাণজিৎ বসুমতাৰী আৰু কৰবেট ফাউণ্ডেশ্যনৰ পশু চিকিৎসক  নবীন পাণ্ডেয়ে বাঘটোৰ মৰণোত্তৰ পৰীক্ষা সম্পন্ন কৰে। প্ৰায় ১০ বছৰীয়া মতা বাঘটোৰ পাৰস্পৰিক যুঁজত মৃত্যু হোৱা বুলি মৰণোত্তৰ পৰীক্ষাৰ পাছত পশু চিকিৎসকে  প্ৰকাশ কৰে।
ইফালে বাঘে বাঘক খোৱা ঘটনা অতি বিৰল যদিও কাজিৰঙাত নিজৰ বিচৰণ ভূমিকলৈ হোৱা সংঘৰ্ষৰ বাবেই এনে ঘটনা হোৱাৰ প্ৰমাণ আছে বুলি জনায় কাজিৰঙাৰ গৱেষণা বিষয়া ৰবীন্দ্ৰ শৰ্মাই। আনহাতে আজি পুৱাই বনবিভাগৰ প্ৰধান মুখ্য বন সংৰক্ষক এ কে যাদৱ, কাজিৰঙাৰ সঞ্চালক পি শিৱকুমাৰৰ উপস্থিতিত  ৰাষ্ট্ৰীয় ব্যাঘ্ৰ সংৰক্ষণ প্ৰাধিকৰণৰ নীতি নিৰ্দেশনা মৰ্মে  মৃত বাঘটো ঘটনাস্থলিতে দাহ কৰা হয়।

Leave a Reply

Your email address will not be published. Required fields are marked *